“Junior Achievement of Armenia” international organisation in Kotayk
Օրեր առաջ "Հայաստանի պատանեկան նվաճումներ" կազմակերպության և ՀՀ Կենտրոնական բանկի համատեղ ջանքերով անցկացվեցին տնտեսագիտական ամենամյա խաղ-մրցույթի կիսաեզրափակիչ և եզրափակիչ փուլերը: Մրցույթին մասնակցում էին հանրապետության բոլոր մարզերի արդեն հաղթած թիմերը, որոնք իրենց ուժերն էին փորձում արդեն Երևանում: Ինչպես և ամեն տարի, այս տարի ևս ժյուրին շատ ներկայացուցչական էր` ՀՀ ԱԺ պատգամավորներ Արտակ Դավթյան և Անահիտ Բախշյան, ՀՀ Կենտրոնական բանկի խորհրդի անդամ Արմենակ Դարբինյան և Հայաստանի պատանեկան նվաճումներ կազմակերպության տնօրեն Արմինե Հովհաննիսյան: Մրցույթի հարցերը հետաքրքիր էին, բազմաբնույթ, կար նաև ինքնուրույն գովազդ պատրաստելու և ներկայացնելու հարց, որը, թերևս, մրցույթի ամենաստեղծագործական և հետաքրքիր մասն էր: Եզրափակիչ փուլ դուրս եկած երեք թիմերը, որոնք ներկայացնում էին Կոտայքի, Արմավիրի և Շիրակի մարզերը, համարյա հավասար ուժերով մտան պայքարի մեջ: Հաղթող ճանաչվեց Արմավիրի մարզի հավաքական թիմը, իսկ երկրորդ պատվավոր տեղը գրավեց Կոտայքի մարզի հավաքականը, որը կազմված էր Աբովյանի թիվ 1, թիվ 4 ավագ և Կամարիսի միջնակարգ դպրոցների աշակերտներից: Այս և նմանատիպ մրցույթները կազմակերպության գործունեության կարևո մասն են կազմում, որոնք մեծացնում են հետաքրքրությունը կազմակերպության իրականացրած ծրագրերի նկատմամբ:
Այս տարի Կոտայքի մարզից ծրագրում ընդգրկվել է 9 դպրոց, իսկ հաջորդ տարիներին կընդգրկվի ևս 18 դպրոց, որոնք կլծվեն նոր գիտելիքների և հմտությունների ուսուցմանն ու կիրառմանը:
"Հայաստանի պատանեկան նվաճումներ" կազմակերպության գործունեության վերաբերյալ մանրամասն տեղեկություններ ստանալու համար կարող եք այցելել կազմակերպության www.jaarmenia.org կայքէջ.
