Բաց նամակ Աբովյանի քաղաքապետ Կարապետ Գուլոյանին

Պարոն քաղաքապետ, հուլիսի 26-ին 168.am լրատվական կայքում հրապարակվել է Անի Կարապետյանի հոդվածը, որտեղ ներկայացվում է Աբովյանի նշանավոր հուշարձաններից մեկը՝ Սարալանջ թաղամասում գտնվող Տրդատ Գ թագավորի արձանը:

Ինչ-որ մարդիկ, գիտակցաբար կամ անգիտակցաբար, մի նոր վանդալիզմ էին իրականացրել՝  թագավորի արձանի մատները ներկելով և դրանց «կանացի տեսք» տալով: Մենք գնացինք հոդվածի հետքերով ու տեսանք, որ քաղաքակիրթ մարդիկ արդեն մաքրել էին ներկը, սակայն արձանը և առհասարակ հուշարձանի տարածքը շարունակում էր մնալ անխնամ և անմխիթար վիճակում, իսկ վիճակն այսպիսին է.

  1. Արձանի վրա շարունակում են մնալ զանազան գրություններ
  2. Ծառերը փակել են արձանը, և այն շատ դժվար է նշմարվում (մերձակա շինության պարիսպը ևս նվազեցնում է արձանի տեսանելիությունը)
  3. Լուսավորության բացակայության պատճառով տարածքը «հարմար» վայր է դառնում «ռազբորկաների» համար, «գրավում է» հարբեցողների, ինչպես նաև այլ հոգեմետ մոլուցքների հակում ունեցող անձանց: Տարածքում կարելի է տեսնել բազմաթիվ կոտրված և չկոտրված շշեր, ապակիներ և այլն…
  4. Հուշարձանից մոտ 30 մետր հեռավորության վրա տեղադրված են աղբարկղեր, որոնք, կարծում ենք, նույնպես անհամատեղելի են հուշարձանի հետ

Մենք՝  Աբովյանի Սբ. Ստեփանոս եկեղեցու երիտասարդներս, կիրակի՝ հուլիսի 28-ին, մաքրեցինք հուշարձանի տարածքը աղբից և կատարեցինք արձանի մասնակի մաքրում: Չկարողացանք այն ավարտին հասցնել որոշ աշխատանքային գործիքներ, նյութեր և լիազորություններ չունենալու պատճառով:

Պարոն քաղաքապետ,

Նկատի ունենալով Տրդատ Գ թագավորի կարևորագույն տեղն ու դերակատարությունը մեր ազգի պատմության մեջ

Հաշվի առնելով պատմական հուշարձանի կարևորությունը որպես քաղաքի այցեքարտ

Կարևորելով  ազգային արժեքների պահպանումը, որ փոխանցվում է մատաղ սերնդին նաև նման հուշարձաններով՝

Խնդրում ենք

Ձեր լիազորությունների շրջանակում տալ հանձնարարականներ

  • Արձանի և դրան հարող տարածքի բարեկարգման աշխատանքների մասին (ներառյալ այնպիսի միջոցառումներ, որոնք արձանն ավելի տեսանելի կդարձնեն)
  • Աղբամանները բնակելի շենքերին մոտ մեկ այլ վայր տեղափոխելու մասին

Ինչպես նաև՝

  • Ժամանակակից լուսավորության միջոցներով ձեռնամուխ լինել արձանի տեսանելիության ապահովմանը նաև գիշերը՝ մթնելուց մինչև լուսաբաց.
  •  Հետևողական լինել ցանկալի բարեկարգ վիճակը մնայուն պահելու խնդրում

Աբովյան քաղաքի Սբ. Ստեփանոս եկեղեցու երիտասարդներ

29.07.2013թ.

   

     

     

   

   

   

   

 

 

2 comments

  1. Tigranuhi Davtyan says:

    Աբովյանի քաղաքապետարանի պատասխան-նամակը

    Սբ. Ստեփանոս եկեղեցու երիտասարդներ,
    Ի պատասխան Ձեր < <Հրապարակ>> թերթում տպագրած Աբովյանի քաղաքապետ Կ. Գուլոյանին ուղղված բաց նամակի (29.07.2013թ.) հայտնում ենք, որ ցավով ենք ընդունում հուշարձանների և ընդհանրապես պատմամշակութային արժեքների նկատմամբ վանդալիզմի ցանկացած դրսևորում, միևնույն ժամանակ տեղեկացնում, որ վերոնշյալ հանցագործության բացահայտումը և մեղավորներին պատժելը չի մտնում քաղաքապետարանի գործառույթների մեջ:
    Հուշարձանի և հարակից տարածքի պահպանությունը քաղաքապետարանը իրագործում է իր հնարավորությունների և լիազորությունների սահմանում: Քաղաքի տարբեր հատվածների, զբոսայգիների, պուրակների և փողոցների բարեկարգման աշխատանքներն իրագործվում են ըստ ծրագրի և ժամանակացույցի: Հուշարձանի հարակից տարածքի ոչ ցանկալի վիճակը պայմանավորված է նաև ջրաոռոգման համակարգի բացակայությամբ, որը չի եղել երբևէ:
    Քաղաքապետի հանձնարարությամբ արդեն իսկ տարվում են հսկայածավալ աշխատանքներ Էլար և Սարալանջ թաղամասերը ջրաոռոգման համակարգով ապահովելու համար: Այս դեպքում հուշարձանի տարածքի կանաչապատումն ու ծառերի էտումը կլինի արդյունավետ, իսկ բարեկարգումը տեսանելի:
    Ինչ վերաբերում է հուշարձանի գիշերային լուսավորությանը, ապա մենք կարևորում ենք քաղաքի բոլոր հուշարձանների լուսավորումը, սակայն միշտ չէ, որ ցանկությունները համընկնում են հնարավորությունների հետ: Չթերագնահատելով հուշարձանների լուսավորության կարևորությունը և ավարտելով կենտրոնական փողոցների գիշերային լուսավորության աշխատանքները` դեռևս առաջնային է համարվում քաղաքի ընդհանուր լուսավորության խնդիրը: Ի վերջո ցանկացած աշխատանք արվում է աստիճանաբար՝ համայնքային բյուջեի հնարավորությունների սահմանում:
    Քաղաքապետ Կ. Գուլոյանը կարևորելով համայնքի բնակիչների ակտիվ մասնակցությունը քաղաքի կյանքին, գնահատում է Ձեր մտահոգությունը, բայց և անհասկանալի համարում բաց նամակի հրապարակումը: Վստահեցնում ենք, որ Աբովյանի քաղապետարան ուղղարկված որևէ դիմում կամ նամակ երբեք չի մնում անպատասխան:

Leave a Reply